आगलागीबाट करीब तीन करोड भन्दा बढीको क्षति

जुम्ला जिल्लाको तिला गाउँपालिका वडा नम्बर ७ गोठी गाउँमा भएको भीषण आगलागीबाट करीब तीन करोड भन्दा बढीको क्षति भएको प्रहरीले जनाएको छ । सो आगलागीबाट ३२ घर जलेर पूर्णरुपमा नष्ट भएको जिल्ला प्रहरी कार्यालय जुम्लाका सूचना अधिकारी युवनकुमार चौधरीले जानकारी दिनुभयो ।

आगलागी भएका घरबाट करीब ६४ वटा पशुचौपाया जलेर मृत्यु भएका छन् । सुधारिएको चुलोेको माथिल्लो भागबाट एक घरको छानोमा रहेको घाँसमा आगो सल्किएपछि गाउँभरि फैलिएको प्रहरी सूचना अधिकारी चौधरीले बताउनुभयो ।

आगलागी भएको गाउँमा अहिले नेपाली सेना, नेपाली प्रहरी, सशस्त्र प्रहरी र स्थानीवासीले आगो नियन्त्रणमा लिएको जिल्ला प्रहरी कार्यालय जुम्लाले जनाएको छ ।

आगलागी भएको गाउँसम्म पुग्न जिल्ला सदरमुकामबाट पैतल हिडेर करीब चार घण्टा लाग्छ । काठैकाठका घर बढी भएकाले आगलागी बढेको गाउँका स्थानीयवासी बताउँछन् । मानवीय क्षति भने भएको छैन ।