लालबन्दीलाई आत्मनिर्भर बनाउने योजना छ : नगर प्रमुख खड्का (अन्तर्वार्ता) - Palikanews.com
Connect with us

अन्तर्वार्ता

लालबन्दीलाई आत्मनिर्भर बनाउने योजना छ : नगर प्रमुख खड्का (अन्तर्वार्ता)

प्रदेश नं २ मा पर्ने ‘लालबन्दी नगरपालिका’ मुख्य व्यापारिक क्षेत्र पनि हो । सत्र वडा रहेको नगरपालिकाका सिमाना पूर्वमा ईश्वरपुर, पश्चिममा हरिवन र हरिपुर, दक्षिणमा हरिपुर र ईश्वरपुर नगरपालिका तथा उत्तरमा सिन्धुली जिल्ला पर्छन् ।

नगरपालिका जिल्लाकै सबैभन्दा बढी क्षेत्रफल दुई सय ३८५ वर्ग किलोमिटर फैलिएको छ । विसं २०६८ को जनगणनानुसार नगरपालिकाको कूल जनसंख्या ५९ हजार ३९५ रहेको तथ्यांकमा उल्लेख गरिएको छ । नगर विकास कोषले नगरपालिकालाई नेपालकै उत्कृष्ट घोषित गर्दै सम्मान गरेको छ ।

नगरपालिकाका गतिविधिलगायत विषयमा नगर प्रमुख मानबहादुर खड्कासँग गरेको कुराकानीको अंशः

नगरपालिकाले कृषि विकासका लागि केकसरी काम गर्दै आएको छ ?

खड्काः नगरपालिकाले कृषि विकासकै लागि भनेर धेरै काम गर्दै आएको छ । सिँचाइसम्बन्धी काम भइरहेको छ । सडक निर्माणको काम पनि हामीले गरेका छौँ । नगरपालिकाभित्र मकै पकेट क्षेत्र छुट्याएका छौँ । पशुपालनतर्फ पनि हामीले जोड दिएका छौँ । पशु पकेट क्षेत्र पनि छुट्याएका छौँ । सहकारीमार्फत पशु सुधार कार्यक्रम पनि सञ्चालन गरेका छौँ । विभिन्न संघसंस्थासँग समन्वय गरेर माउपाठी, बीउ वितरणको कार्यक्रम पनि राखेका छौँ ।

नगरपालिकाभित्रको एउटा वडालाई गाई पकेट क्षेत्र भनी छुट्याएका छौँ । कृषकलाई कम्पोष्ट मल बनाउने तालीम दिइरहेका छौँ भने उत्पादित तरकारी बजारीकरणको व्यवस्था पनि मिलाएका छौँ । उत्पादित खाद्यवस्तु प्रशोधनको काम गरेका छौँ भने भण्डारणको कामलाई अघि बढाएका छौँ । हाम्रो नगरपालिकालाई समृद्ध बनाउने मूलतत्व भनेको नै तरकारी उत्पादन हो । विशेषगरी यहाँ टमाटर धेरै मात्रामा उत्पादन हुने गरेको छ । गोलभेँडाको शहर लालबन्दी भनेर पहिचान बनिसकेको छ ।

नगरपालिकाका कति नागरिक कृषि पेशामा आबद्ध छन् ?

खड्काः यहाँका ५० प्रतिशतभन्दा बढी नागरिक कृषि पेशामा आबद्ध छन् । हामीले हरेक वर्ष पशुपालनतर्फ उत्कृष्ट काम गर्ने कृषकलाई १० हजार दिएर सम्मान गर्ने गरेका छौँ । यति हुँदाहुँदै पनि फलफूल राम्रो उत्पादन गर्ने कृषकलाई चाहिँ पुरस्कारको व्यवस्था मिलाउन सकिएको छैन ।

उत्कृष्ट काम गरेको भनी नगर विकास कोषले लालबन्दी नगरपालिकालाई सम्मान गर्दा कस्तो महसुस गर्नुभयो ? 

खड्काः म त खुशी छु । नगर विकास कोषद्वारा हाम्रो नगरपालिकालाई नेपालकै उत्कृष्ट नगरपालिका घोषणा गरी सम्मान गरिएको छ । राम्रो काम गर्‍यो भने त्यसको परिणाम पनि राम्रो आउने रहेछ । कोषले हामीलाई उत्कृष्ट नगरपालिका घोषणा गरी कदरपत्र र एक लाख पुरस्कारले सम्मान गरेको छ । नगरपालिकाले कोषको लगानीमा डुमडुमे मन्दिर नजिक छतले व्यावसायिक भवन निर्माण गरिरहेको छ जसबाट पनि हाम्रो मूल्यांकन फरक तरिकाबाट भएको होला ।

तपाईं निर्वाचित हुनुअघि र निर्वाचित भइसकेपछि नगरपालिकामा कस्ता खाले परिवर्तन आएका छन् ?

खड्काः यो मुलुक सङ्घीयतामा गएपछि सात वटा गाविस मिलेर हाम्रो नगरपालिका बनेको हो । नगरपालिकाभित्र पहिलाको तुलनामा त अहिले धेरै परिवर्तन आएको छ । अहिले सडकको विकास भएको छ । खानेपानीको उचित व्यवस्थापन भएको छ ।

कच्ची सडक पनि धमाधम पिच हुन थालेका छन् । सबै वडामा स्वास्थ्यचौकीको स्थापना भएको छ । सिँचाइको काम भएको छ । पर्यटन विकासको लागि जोड दिएका छौँ । नगरपालिका भवनको निर्माण भएको छ । स्वास्थ्य भवन निर्माण भएका छन् । विकासनिर्माणका काम अघि बढेका छन् । विद्यालयको भवन निर्माण भएका छन् भने गुणस्तरीय शिक्षाका लागि विशेष ध्यान दिन थालिएको छ । साथै ग्रामीण क्षेत्रका नागरिकको दुःखसुखको साथी स्थानीय तह बनाउने काममा हामी लागिपरेका छौँ ।

नगरपालिकामा ठूला योजना तथा परियोजना केके छन् ?

खड्काः ठूलो योजनाका रुपमा पुल निर्माणको काम रहेको छ । नगरपालिकाले १३ करोडको लगानीमा पुल निर्माणको काम गरेको छ । यसमा पाँच करोड बजेट सङ्घीय सरकारको रहेको छ । नारायण डाँडामा एक करोडभन्दा बढीको लगानीमा भ्यूटावरको निर्माण भइरहेको छ ।

हामीले केही उद्योग पनि सञ्चालन गरेका छौँ । नगरपालिकाको आयस्रोत वृद्धि गर्नका लागि ठूलाठूला भवन निर्माण गरेर भाडा लगाउने काम पनि गरेका छौँ । ६० लाखसम्म भाडा आउने गरेर भवनको निर्माण गरेका छौँ । प्रत्येक वर्ष आएको रकमबाट २० प्रतिशत आर्थिक वृद्धिका लागि लगानी गर्ने गरेका छौँ । पचास प्रतिशत रकम वडाका ससाना कामका लागि वितरण गर्दै आइरहेका छौँ । बचेको ३० प्रतिशत बजेटबाट नगरपालिकाको ठूलाठूला आयोजना अथवा गौरवको आयोजनाका काममा खर्च गर्ने गरेका छौँ ।

यहाँका दुई वडामा बिजुली बत्ती पुगेको छैन । यद्यपि ७० प्रतिशत घरमा बिजुली पुगिसकेको छ र हाम्रै कार्यकालमा ती दुई वटै वडामा बिजुली पुर्‍याइसक्ने गरी काम शुरु भएको छ ।

तपाईंको नगरपालिकाको सबैभन्दा ठूलो उद्योग वा व्यापारिक कम्पनी कुन हो ?

खड्काः ठूलो उद्योगको रुपमा भूदेव खाद्य उद्योग छ । यसले दाल, चामललगायत उत्पादन गर्छ । यसबाहेक नगरपालिकामा स्थानीय नागरिकले सञ्चालन गरेका साना तथा मझौला उद्योग प्रशस्त छन् ।

सबैभन्दा धेरै कर कुन कम्पनीले तिरेको छ ?

खड्काः सबैभन्दा बढी कर त भूदेव खाद्य उद्योगले नै तिर्ने गरेकोे छ । यसबाहेक पसल कर संकलन हुने गरेको छ । नदी पनि ठेक्कामा लगाउँदा सोहीअनुसार कर उठ्ने गरेको छ ।

आफ्नो नगरपालिकाभित्रका पर्यटकीय क्षेत्रको प्रचारप्रसार कसरी गरिरहनुभएको छ ?

खड्काः हामी पर्यटनको विकासका लागि भनेर नै भ्यूटावरको निर्माण गर्दै छौँ । पर्यटकीय क्षेत्रमा सडक पुर्‍याउन पनि हामी लागिपरेका छौँ । हामीले मठ, मन्दिरको निर्माण पनि गरिरहेका छौँ । डुमडुमे मन्दिर पनि हाम्रो नगरपालिकामा रहेको छ । हामीले पर्यटन पूर्वाधारको विकासमा पनि जोड दिएका छौँ भने स्थानीय सञ्चारमाध्यमबाट नगरभित्रका पर्यटकीय तथा धार्मिकस्थलको समयानुसार र आवश्यकतानुसार प्रचारप्रसार गरिरहेका छौँ ।

नगरपालिकाले युवालाई रोजगारीको सिर्जना कसरी गरिरहेको छ ?

खड्काः नगरपालिकाभित्र युवा स्वरोजगार कार्यक्रम सञ्चालन भइरहेको छ । हामीले युवा स्वरोजगारअन्तर्गत पनि रोजगार दिँदै आइरहेका छौँ । सरकारी तथा गैरसरकारी सङ्घ/संस्थालगायतसँग सहकार्य गर्दै केही युवालाई कृषि पेशामा संलग्न गराएका छौँ । केही युवालाई भने विकास निर्माणलगायतका काममा पनि लगाइरहेका छौँ ।

विकासनिर्माणको काम कत्तिको प्रभावकारी भएका छन् ?

खड्काः नगरपालिकामा अहिलेसम्म भएका विकासनिर्माणको काम प्रभावकारी छन् । हामीले अरुमार्फत काम गराउँदा पनि स्थलगत अनुगमन गरिरहेका छौँ । हामीले आशा गरेअनुसार विकासनिर्माणको काम भइरहेको हुनाले हामी खुशी नै छौँ । विकासनिर्माणका काममा नगरवासीले पनि आवश्यक सहयोग गरिरहनुभएको छ ।

स्थानीय तह र प्रदेश सरकारबीचको समन्वय कसरी गरिरहनुभएको छ ?

खड्काः प्रदेश सरकारसँग हामीले योजना तथा कार्यक्रम मागेका हुन्छौँ । योजनाअनुसारको बजेट आउने गरेकै छ । गत वर्ष प्रदेश सरकारले हामीलाई एक करोड ५० लाख बजेट पठाएको थियो । हरेक वर्ष आवश्यकताअनुसार प्रदेश सरकारले सहयोग गरिरहेको छ ।

स्थानीय तहमा काम गर्दा मुख्य समस्या केके आइपर्छन् ?

खड्काः स्थानीय तहमा काम गर्दा सामान्य समस्या देखा पर्ने गर्छ । प्रतिशोध भएका मानिस समाजमा धेरै नै हुन्छन् । राजनीतिक प्रतिशोध पनि भइरहेकै हुन्छ । यसले गर्दा कतिपय ठाउँमा समस्या पनि हुने गरेको छ । सामान्य विकास निर्माणको काममा पनि समस्या आउने गरेको छ तर पनि यस्ता समस्यालाई समाधान गरेर हामी अघि बढिरहेका छौँ । केही व्यक्तिबाहेक सबै नगरवासीले हामीलाई सहयोग गरी रहनुभएको छ ।

केन्द्र सरकारबाट कत्तिको सहयोग मिलेको छ ?

खड्काः केन्द्र सरकारबाट पनि हामीले राम्रो सहयोग पाएका छौँ । केन्द्र सरकारलाई योजना पेश गर्दा उसले केही बजेट पठाउने गरेको छ । आवश्यकताका आधारमा बजेटको व्यवस्था केन्द्र सरकारले गरिरहेकै छ ।

तपाईंको कार्यकालमा नगरपालिकालाई कस्तो बनाउने योजना छ ?

खड्काः नगरपालिकालाई आत्मनिर्भर बनाउने योजना छ । कृषिका माध्यमबाट कसरी स्वरोजगार बनाउन सकिन्छ भनेर विशेष ध्यान दिइरहेका छौँ । सबै वडासम्म पुग्ने तथा हाइड्रोसँग जोड्ने सडक कालोपत्रे गर्ने योजना छ । हरेक नागरिकका घरमा बिजुलीबत्ती र सडक पुर्‍याउने लक्ष्य लिएको छु । सोहीअनुसार अहोरात्र काम गरिरहेका छौँ । नगरका सबै जनप्रतिनिधिको साथ सहयोग निरन्तर रहेको छ ।

नगरपालिकामा तपाईंले चाहेर पनि गर्न हुन नसकेको विकासनिर्माणका कार्य केके छन् रु

खड्काः नदीलाई नियन्त्रण गर्ने काम त्यत्तिकै छ । शैक्षिक क्षेत्रको सुधारतर्फ सोचेजस्तो काम गर्न सकिएको छैन । शहरी क्षेत्रमा शिक्षाको अवस्था राम्रै भए पनि ग्रामीण क्षेत्रमा भने धेरै सुधार गर्नुपर्ने छ । बजार, बसपार्क र बस्ती व्यवस्थापन गर्न सकिएको छैन ।

नगरपालिकाले खेलकूद विकासका लागि भनेर केकस्ता योजना ल्याएको छ रु

खड्काः विद्यालयस्तरको खेलकूद प्रतियोगिता नगरपालिकामा धेरै हुने गरेका छन् । नगरपालिकामा राधाकृष्ण, लाफा, लेकाली चौंँरीलगायत खेल मैदान छन् । ती खेल मैदानमा वडास्तरीय खेलकूद प्रतियोगितादेखि राष्ट्रपति रनिङशिल्ड प्रतियोगितासम्म सञ्चालन भएका छन् । बक्सिङ, भलिबल, कराते, फुटबललगायत खेल नगरपालिकाले आयोजना गर्ने गरेका छौँ ।

नगरपालिकाको विकासनिर्माणमा कोरोना भाइरसले कतिको प्रभाव पार्‍यो ?

खड्काः खासै प्रभाव परेन । सर्लाही जिल्लामा रहेका बीस वटा स्थानीय तहमध्ये सबैभन्दा कम कोरोना प्रभावित स्थानीय निकायका रुपमा लालबन्दी थियो । स्वास्थ्यकर्मी, सुरक्षाकर्मी, जनप्रतिनिधिका साथै नगरवासीको उच्च सतर्कताका कारण यहाँ कोरोना भाइरसले त्यति धेरै प्रभावित बनाएन ।

कोरोना भाइरस संक्रमण नफैलिएको भए अलि बढी विकासनिर्माणको काम हुन्थ्यो भने कोरोना भाइरस फैलिएपछि त्रासका कारण सोचे जति विकासनिर्माणको काम नभए पनि काम रोकिएन । विकासनिर्माणका लागि नगरले व्यवस्था गरेको केही बजेट कोरोना व्यवस्थापनका नाममा खर्च भयो । अरु विकासनिर्माणका काममा नगरमा खासै प्रभाव नपरे पनि बाहिरबाट आउने विकासनिर्माणका काममा प्रभाव भने अवश्य परेको थियो । अहिले केही सहज हुन थालेको छ ।

स्वास्थ्य क्षेत्रको विकासका लागि कसरी काम गर्दै हुनुहुन्छ ? 

खड्काः हामीले नगरपालिकाभित्रका सम्पूर्ण वडामा आधारभूत स्वास्थ्य सेवा पुर्‍याएका छौँ । यस वर्ष हामीले अस्पताल निर्माणको काम पनि अघि बढाएका छौँ । सम्पूर्ण नागरिकको प्राथमिक स्वास्थ्य सेवासम्म पहुँच पुगेको छ भने आँखा उपचार केन्द्र एवं विभिन्न सङ्घसंस्थाद्वारा सञ्चालित स्वास्थ्य सेवा नगरपालिकामा उपलब्ध भइरहेका छन् । सरकारी स्वास्थ्य संस्थालाई दूरदराजका नागरिकको स्वास्थ्यको साथीका रुपमा स्थापित गराउने कामको शुरुवात गरेका छौँ ।

अन्य जनप्रतिनिधिसँग कस्तो सम्बन्ध छ ? 

खड्काः चुनावी मैदानमा हुँदा जुन पार्टीबाट चुनाव जिते पनि जनप्रतिनिधि भएपछि कतै पनि राजनीतिक सङ्केत देखिएको छैन । नगरका विकासनिर्माणमा सबै जनप्रतिनिधि साथीहरुले साथसहयोग दिइरहनुभएको छ । सबैसँगको छलफल र सल्लाहअनुसार नगरको विकासनिर्माण चलिरहेका छन् ।

  •  
  •  
  •  
  •  

Click to comment

Leave a Reply

Your email address will not be published. Required fields are marked *

बागमती51 years ago

नेपाल एयरलाइन्सको विमान आजै बेइजिङ जादै

मुख्य समाचार51 years ago

शनिबार थप ८,०४६ जनामा सङ्क्रक्रमण पुष्टि, १८७ सङ्क्रमितको मृत्यु, ५,४५५ डिस्चार्ज

बागमती51 years ago

भक्तपुर अस्पतालले पनि अक्सिजन प्लान्ट राख्दै

बागमती51 years ago

वाणिज्य बैंकका शाखा खुल्न तीन स्थानीय तहमा बाँकी

बागमती51 years ago

जनस्वास्थ्यविद, कोभिड नियन्त्रणका लागि प्रधानमन्त्री ओलीद्वारा सामुहिक छलफल

बागमती51 years ago

मकवानपुरका नौ वटा स्थानीय तहमा आइसोलेशन कक्ष संचालनमा

बागमती51 years ago

चरीकोट अस्पताललाई ५८ थान अक्सिजन सिलिन्डर हस्तान्तरण

बागमती51 years ago

नयाँ सरकार गठनसँगै सबै निकाय कोभिडविरुद्ध सक्रिय

कर्णाली51 years ago

हुम्लामा दुई गाउँपालिका ‘सिल’

बागमती51 years ago

अक्सिजन अभावले वीर अस्पतालको नयाँ भवन सञ्चालनमा समस्या

मुख्य समाचार51 years ago

बाँकेमा कोभिड दोस्रो लहरमा झण्डै तीन गुणा बढीको मृत्यु

लुम्बिनी51 years ago

बाँकेमा थप पाँच सङ्क्रमितको उपचारको क्रममा मृत्यु

विशेष51 years ago

सुदूरपश्चिम खाना महोत्सवः मौलिक स्वाद लिंँदै आगन्तुक

बागमती51 years ago

राजधानीको व्यस्त सडकमै मञ्च : यातायात अस्तव्यस्त, नागरिकलाई सास्ती

बागमती51 years ago

सरकारले ल्यायो अर्को अध्यादेश, राष्ट्रपतिले गरिन् जारी

गण्डकी51 years ago

गण्डकी प्रदेशको बजेट समय मै कार्यान्वयन गर्न निर्देशन

मुख्य समाचार51 years ago

नगर प्रमुखको हस्ताक्षर सहितको गोप्य चिट बाहिरीएपछि…

प्रदेश २51 years ago

स्थानीय सरकार: गएगुज्रेको गुजरा मोडल

मुख्य समाचार51 years ago

अर्थमन्त्रीले आफ्नो स्वार्थका लागि विद्युतीय गाडीमा कर लगाएको गगन थापाको आरोप

विशेष51 years ago

बझाङ दुर्घटना : मेयरको रात्री भोजको मदिरा पिएर जेसीभी चलाउदा दुर्घटना भएको खुलासा

मुख्य समाचार51 years ago

कर्णाली नदीमा पानीको बहाब बढेपछि आवतजावतमा समस्या

बागमती51 years ago

बाह्रबिसे नगरपालिका मेयर भन्छन्– ‘भ्रामक समाचारविरुद्ध कानुनी उपचार खोज्छु’

मुख्य समाचार51 years ago

झलनाथ खनाल र भीम रावलले ओलीलाई पठाएको ३१ बुँदे पत्रमा के छ ? (पत्रसहित)

प्रदेश २51 years ago

बटेश्वर गाउँपालिका : सरकारी गाडीमा निजी नम्बर प्लेट

Advertisement