काठमाडौं – प्रधानमन्त्री बालेन शाहले प्रतिनिधिसभा बैठकलाई सम्बोधन गर्दै रसुवामा आएको विनाशकारी बाढीबारे जानकारी गराउने भएका छन्।
प्रतिनिधिसभाको बैठक बुधबार दिउँसो १ बजे बस्दैछ। बैठकमा प्रधानमन्त्री शाहले भोटेकोशी नदीमा आएको बाढी, त्यसबाट भएको क्षति तथा सरकारले गरिरहेको उद्धार, राहत र पुनःस्थापनाका कामबारे सांसदहरूलाई जानकारी गराउने तय भएको हो।
सभामुख डोलप्रसाद अर्यालको सचिवालयका अनुसार बैठकमा भोटेकोशी–त्रिशूली बाढीबाट भएको जनधनको क्षतिका सम्बन्धमा विशेष प्रस्तावसमेत प्रस्तुत हुनेछ। प्रस्तावमा बाढीबाट मृत्यु तथा बेपत्ता भएकाहरूप्रति दुःख व्यक्त गर्दै प्रभावितको व्यवस्थापन, घाइतेको शीघ्र स्वास्थ्यलाभ तथा शोकसन्तप्त परिवारप्रति समवेदना व्यक्त गरिनेछ।
गत भदौ १० गते रसुवाको भोटेकोशी नदीमा आएको भीषण बाढीले रसुवा, नुवाकोट, धादिङ, चितवन र गोरखालगायतका जिल्लाका नदी तटीय क्षेत्रमा ठूलो क्षति पुर्याएको छ। बाढीबाट सडक, पुल, जलविद्युत् आयोजना तथा अन्य भौतिक संरचनामा समेत व्यापक क्षति भएको छ।
प्रधानमन्त्री शाहले यसअघि भोटेकोशीमा आएको बाढी जलवायु परिवर्तनसँग जोडिएको विपद् भएको बताएका छन्। उनले हिमाली क्षेत्रमा बढ्दो जलवायुजन्य जोखिमप्रति अन्तर्राष्ट्रिय समुदायको ध्यानाकर्षण गराउनुपर्ने बताएका छन्।
संसद् बैठकमा बाढीपछि जारी खोज तथा उद्धार, राहत वितरण र प्रभावितको पुनःस्थापनाका विषयमा समेत छलफल हुने अपेक्षा गरिएको छ।
