काठमाडौं – पछिल्लो चार दिनदेखि परेको अविरल वर्षाका कारण आएको बाढीपहिरो र सडक भासिने घटनाले देशका विभिन्न प्रमुख राजमार्ग तथा सडकखण्डमा यातायात अवरुद्ध भएको छ । नेपाल प्रहरीका अनुसार रसुवा, नुवाकोट, धादिङ, काभ्रेपलाञ्चोक, चितवन, मनाङ, बागलुङ, रोल्पा, कालिकोट, गुल्मी, म्याग्दी, मुस्ताङ, हुम्ला, नवलपरासी पूर्व, पाल्पा, ललितपुर, लमजुङ, तनहुँ र पर्वतलगायत जिल्लाका सडक प्रभावित भएका छन् ।
रसुवाको पासाङ ल्हामु राजमार्ग त्रिशूली नदीमा आएको बाढीले नदी किनारको अधिकांश भाग कटान गरेपछि पूर्ण रूपमा अवरुद्ध भएको छ । प्रहरीले काठमाडौँबाट टोखा–छहरे–विदुर–नुवाकोट, दरबार–फलाँटे–चोकदे–लच्याङ–सरमथली–पाच्र्याङ–भोर्ले–जिरो किलोमिटर–कालिकास्थान–स्याउबारी–राम्चे–सोले–धुञ्चे हुँदै स्याफ्रुबेँसी पुग्ने एक लेनको कच्ची वैकल्पिक सडक भने प्रयोग गर्न सकिने जनाएको छ ।
नुवाकोटको टोखा–छहरे सडकखण्डमा राति १० बजेदेखि बिहान ५ बजेसम्म अत्यावश्यक सेवाबाहेक सार्वजनिक तथा निजी सवारीसाधनको आवागमन बन्द गरिएको छ । अर्को सूचना जारी नभएसम्म उक्त व्यवस्था लागू रहने प्रहरीले जनाएको छ ।
पृथ्वीराजमार्गका विभिन्न स्थानमा पहिरो खसेपछि यातायात प्रभावित भएको छ । कृष्णभीर क्षेत्रमा ठूलो ढुङ्गासहितको पहिरो खसेपछि सडक एकतर्फी सञ्चालनमा आएको छ । बेनिघाट रोराङ–१० स्थित पानीधारामा पहिरोका कारण सडक पूर्ण रूपमा अवरुद्ध रहेको प्रहरीले जनाएको छ ।
चितवनको नारायणगढ–मुग्लिन सडकखण्डका विभिन्न स्थानमा पहिरो गएपछि अर्को सूचना नभएसम्म सबै सवारीसाधनको आवागमन बन्द गरिएको छ । बिपी राजमार्गअन्तर्गत काभ्रेपलाञ्चोकको रोशी गाउँपालिका–७ चारसयबेँसी र रोशी–८ गिम्दीबेँसीमा पहिरो गएपछि सडक अवरुद्ध छ । धुलिखेल नगरपालिका–८ पकुचामा पहिरो खसेपछि अरनिको राजमार्गसमेत अवरुद्ध भएको प्रहरीले जनाएको छ ।
गण्डकी प्रदेशमा मनाङको बेँसीसहर–खाङसार सडकखण्डमा साँझ ६ बजेदेखि बिहान ६ बजेसम्म सवारीसाधन सञ्चालनमा रोक लगाइएको छ । मनाङकै चामे–बेँसीसहर सडकखण्ड पहिरोका कारण पूर्ण रूपमा अवरुद्ध भएको छ ।
बागलुङको मध्यपहाडी लोकमार्ग र कालीगण्डकी करिडोर, रोल्पाको घोराही–थवाङ–रुकुम सहिदमार्ग तथा कालिकोटको कर्णाली राजमार्ग पनि पहिरो र लेदोका कारण अवरुद्ध छन् । गुल्मीका रिडी–तम्घास मदनभण्डारी राजमार्ग, रुद्रबेनी–वामीटक्सार सडक तथा कालीगण्डकी करिडोरका विभिन्न स्थानमा पहिरो र खोलाको बहाव बढेपछि यातायात प्रभावित भएको छ ।
त्यस्तै, म्याग्दीको बेनी–जोमसोम, मुस्ताङको जोमसोम–कोरला, हुम्लाको कर्णाली करिडोर, नवलपरासी पूर्वको कालीगण्डकी करिडोर, पाल्पाको सिद्धार्थ राजमार्ग र ललितपुरको कान्तिलोकपथमा पनि पहिरो तथा लेदोका कारण यातायात सञ्चालन हुन सकेको छैन ।
लमजुङको बेँसीसहर–मनाङ सडक तथा मध्यपहाडी लोकमार्ग, तनहुँको पृथ्वीराजमार्ग र पर्वतको मालढुङ्गा–बेनी सडकखण्डमा पनि पहिरोका कारण यातायात अवरुद्ध रहेको प्रहरीले जनाएको छ ।
लगातारको वर्षाका कारण जोखिम बढेपछि देशका विभिन्न जोखिमयुक्त सडकमा रातिको आवागमन रोक्ने तथा कतिपय सडकमा पूर्ण रूपमा यातायात बन्द गर्ने निर्णय गरिएको छ । प्रहरीले जोखिमयुक्त सडकमा अनावश्यक यात्रा नगर्न तथा स्थानीय प्रशासन र सुरक्षा निकायबाट जारी सूचनाअनुसार मात्र यात्रा गर्न आग्रह गरेको छ ।



