काठमाडौं – नेपाली कांग्रेसका सभापति गगनकुमार थापाले प्रहरी हिरासतमा रहेका ‘फिक्सर’ इनम सापकोटासँग जोडिएको विवादास्पद अडियोमा आफ्नो नाम जोडिएको विषयलाई ठाडै अस्वीकार गरेका छन्। उनले आफू कुनै गलत, अनैतिक वा आर्थिक लेनदेनमा संलग्न नरहेको दाबी गर्दै अडियो प्रकरणको निष्पक्ष अनुसन्धान गर्न चुनौती दिएका छन्।
थापाले अडियोमा आफ्नो नाम कसरी र किन जोडियो भन्ने विषयमा आफू अनभिज्ञ रहेको बताए। अडियोमा भएको कुराकानीको वास्तविकता अनुसन्धानबाटै खुल्ने भन्दै उनले त्यसलाई आधार बनाएर आफूविरुद्ध लगाइएका आरोप अस्वीकार गरे।
उनले कांग्रेसको आधिकारिकता र पार्टीभित्रको आन्तरिक रूपान्तरणका लागि भइरहेको राजनीतिक तथा कानुनी संघर्षलाई आर्थिक लेनदेनसँग जोड्नु गलत भएको बताए। उनका अनुसार पार्टीको आधिकारिकताको लडाइँ कुनै व्यक्तिको आर्थिक स्वार्थ पूरा गर्न नभई राजनीतिक र वैधानिक विषयमा केन्द्रित रहेको हो।
‘विद्रोह गर्नेले परिणामको चिन्ता गर्छ ? करोडको कुरा गर्छन् ! पार्टीको आधिकारिकताको राजनीतिक–कानुनी लडाइँमा रुपैयाँ होइन, एक सुकाको पनि कुनै आर्थिक लेनदेन र अनुचित काम भएको छैन,’ थापाले भने।
थापाले अडियो प्रकरणमा छानबिन आवश्यक रहेको स्वीकार गरे पनि अनुसन्धानको निष्पक्षतामा भने जोड दिए। अडियो कहाँ र कसरी तयार भयो, कसले बोलेको हो, कसले कसलाई बोलाएको हो र त्यसको उद्देश्य के थियो भन्ने विषय अनुसन्धानको दायरामा आउनुपर्ने उनको भनाइ छ।
‘अडियो कहाँ, कसले, कहिले र किन बोल्यो वा बोलाइयो, त्यो अनुसन्धानको विषय हो । अनुसन्धान निष्पक्ष हुनुपर्छ, दूधको दूध पानीको पानी छुटिन्छ,’ उनले भने।
अडियो सार्वजनिक भएपछि आफू डराएर विभिन्न राजनीतिक दलका शीर्ष नेताहरूसँग भेटघाट गर्न पुगेको भन्ने चर्चालाई पनि थापाले अस्वीकार गरे। उनले राजनीतिक भेटघाटलाई अडियो प्रकरणसँग जोडेर आफू दबाबमा परेको प्रचार गरिएको संकेत गर्दै आफू कुनै डर वा त्रासमा नरहेको बताए।
‘म तर्सिने जिनिस नै होइन, तर्सिने बानी नै छैन,’ थापाले भने।
उनले यसअघि नै महामन्त्री विश्वप्रकाश शर्माले पार्टी कार्यालयबाट अडियो प्रकरणबारे कांग्रेसको धारणा सार्वजनिक गरिसकेको स्मरण गराउँदै पार्टी निष्पक्ष छानबिनका लागि तयार रहेको बताए। थापाका अनुसार छानबिनले अडियोको वास्तविकता र त्यसमा जोडिएका व्यक्तिहरूको भूमिकाबारे स्पष्ट पार्नुपर्छ।
विवादास्पद अडियो सार्वजनिक भएपछि राजनीतिक वृत्तमा कांग्रेसको आन्तरिक विवाद, पार्टीको आधिकारिकताको कानुनी संघर्ष र त्यससँग जोडिएका आर्थिक गतिविधिबारे प्रश्न उठिरहेका बेला थापाको यस्तो प्रतिवाद आएको हो। उनले भनेका दाबीअनुसार उक्त राजनीतिक संघर्षमा कुनै आर्थिक लेनदेन वा अनुचित गतिविधि भएको छैन।
अब अडियोको सत्यता, त्यसमा प्रयोग भएका आवाज र कुराकानीको पृष्ठभूमि तथा थापाको नाम कसरी जोडियो भन्ने विषय अनुसन्धानबाट प्रमाणित हुनुपर्ने देखिएको छ। थापाले भने आरोपको राजनीतिक जवाफभन्दा निष्पक्ष अनुसन्धानबाटै ‘दूधको दूध, पानीको पानी’ छुट्टिनुपर्ने बताएका छन्।
