काठमाडौं – रसुवामा आएको विनाशकारी बाढीमा परी ज्यान गुमाएका मध्ये हालसम्म एक हजार ३५५ जनाको शव फेला परेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। फेला परेका शवमा विभिन्न मानव अङ्गसमेत समावेश छन्।
प्राधिकरणका अनुसार हालसम्म फेला परेका शवमध्ये ९८ जनाको सनाखत गरी आफन्तलाई बुझाइएको छ। प्राधिकरणका प्रवक्ता शान्ती महतका अनुसार रसुवामा १६९, नुवाकोटमा १९७, धादिङमा ७०, गोरखामा ७५, तनहुँमा ३८, चितवनमा ३६३, नवलपरासी पूर्वमा २२२ र नवलपरासी पश्चिममा २२१ शव फेला परेका छन्।
बाढीमा परी करिब चार हजार ९९६ जना अझै सम्पर्कविहीन रहेको प्राधिकरणको तथ्याङ्क छ। रसुवा जिल्ला प्रशासन कार्यालयबाट करिब एक हजार ९६७ जना र नुवाकोटबाट करिब दुई हजार ३४० नेपाली नागरिक सम्पर्कविहीन रहेको विवरण अद्यावधिक भएको प्रवक्ता महतले बताउनुभयो।
उहाँका अनुसार सुरक्षाकर्मी तथा कर्मचारी करिब १०० जना र विदेशी नागरिक करिब ५८९ जना पनि सम्पर्कविहीन रहेको विवरण छ।
यसबीच बाढी प्रभावित क्षेत्रमा फसेका तथा जोखिममा परेका १३ हजार ३९६ जनाको उद्धार गरिएको प्राधिकरणले जनाएको छ। बाढीका कारण घाइते भएका ६ हजार ६७२ जनाको उपचार गरिएको छ।
उपचार गरिएकामध्ये विभिन्न अस्पतालमा ३२३ जनालाई भर्ना गरी उपचार गरिएको थियो। तीमध्ये २२८ जना उपचारपछि घर फर्किसकेका छन्।
बाढी प्रभावितका लागि विभिन्न स्थानमा स्थापना गरिएका ३९ वटा होल्डिङ सेन्टरमा अहिले तीन हजार ५३३ जना रहेका छन्। प्राधिकरणका अनुसार रसुवामा ६६९, नुवाकोटमा दुई हजार ६५१ र धादिङमा २१३ जना होल्डिङ सेन्टरमा आश्रय लिइरहेका छन्।
उद्धार, राहत तथा सुरक्षा व्यवस्थापनका लागि बाढी प्रभावित क्षेत्रमा २१ हजार ४०२ सुरक्षाकर्मी परिचालन गरिएको छ। नेपाली सेनाका नौ हजार २८७, नेपाल प्रहरीका सात हजार ९१२ र सशस्त्र प्रहरी बलका चार हजार २०३ जना सुरक्षाकर्मी खोज, उद्धार तथा राहत कार्यमा खटिएका छन्।
बाढीपछि ठूलो संख्यामा मानिस अझै सम्पर्कविहीन रहेको र फेला परेका शवमध्ये समेत धेरैको सनाखत हुन बाँकी रहेकाले खोज तथा उद्धारसँगै शव पहिचानको कामलाई समेत तीव्रता दिनुपर्ने अवस्था रहेको प्राधिकरणले जनाएको छ।
