काठमाडौं, भदौ २२ गते । स्थानीय तहका कर्मचारीहरुले भने निजामती सेवा दिवस बहिष्कार गरेका छन् । संघका कर्मचारीहरुलाई जस्तै समान व्यवहार नगरिएको भन्दै २० औं निजामती सेवा दिवस, २०८० बहिष्कार गरेका हुन् ।
‘व्यावसायिक र सिर्जनशील प्रशासन : विकास, समृद्धि र सुशासन’ भन्ने नाराका साथ २० औं निजामती सेवा दिवस, २०८० आज मनाइँदै छ । ंघीय मामिला तथा सामान्य प्रशासन मन्त्रालयले सबै स्थानीय तहहरुलाई निजामती सेवा दिवस मनाउन सर्कुलर गरेको थियो ।
तर प्रस्तावित निजामती सेवा विधेयकमा स्थानीय तहका कर्मचारीलाई निजामती सेवाको परिभाषामा नसमेटेको र सेवा सुविधा तथा वृद्धि विकासको सुनिश्चितता नभएको भन्दै स्थानीय तहका कर्मचारीहरुले दिवस बहिष्कार गरेका छन् ।
बिहीबारको मन्त्रिपरिषद बैठकले ‘संघीय निजामती सेवाको गठन, सञ्चालन र सेवाको शर्तसम्बन्धी विधेयक, २०८०’ लाई संघीय संसदमा पेश गर्ने निर्णय गरेको थियो ।
विभेदयुक्त व्यवस्था सहितको विधेयक संशोधनको माग गर्दै स्थानीय तहका कर्मचारीहरुले निजामती सेवा दिवस नमनाएर बहिष्कार गर्ने घोषणा गरेका छन् । उनीहरुले विरोधस्वरुप कालोपट्टी बाँधेर काममा खटिने निर्णय गरेका छन् । त्यसको जानकारी स्थानीय तहहरुका कर्मचारीले संघीय मामिला तथा सामान्य प्रशासन मन्त्रालयलाई पत्राचार गरेरै दिएका छन् ।
हरेक वर्ष भदौ २२ गते मनाइने यो दिवसमा प्रभातफेरी, कर्मचारीहरुलाई सम्मान तथा पुरस्कार वितरण लगायतका कार्यक्रम गरिन्छ । दिवसको अवसरमा आज पनि सिंहदरबारमा औपचारिक समारोह आयोजना गरिएको छ । निजामती सेवा दिवस मूल समारोह समितिको संयोजक मुख्य सचिव हुन्छन् ।
