फिल्म ‘महाजात्रा’ आज शुक्रबारबाट प्रदर्शनको छैटौँ सातामा प्रवेश गरेको छ । षट्कोण आर्ट्सको ब्यानरमा निर्माण भएको फिल्म गत वर्षको चैत्र ९ गते रिलिज भएको थियो । फिल्म ५१ औँ दिन मनाउन सक्ने निर्माण युनिटको अनुमान छ ।
‘जात्रा’ को तेस्रो सिक्वेलको रूपमा निर्माण भएको फिल्मका लेखक तथा निर्देशक प्रदीप भट्टराई हुन् । प्रदीपका अघिल्ला फिल्महरूले पनि ५१ औँ दिनको यात्रा तय गरेको थियो ।
निर्देशक भट्टराईले स्वदेशसँगै विदेशका दर्शकले फिल्मलाई मन पराउनु सबैभन्दा ठुलो सफलता रहेको बताउँछन् । ‘हाम्रो फिल्मले विश्वभर रहनु भएका नेपालीलाई मनोरञ्जन दिएको छ । म लगायत मेरो टिमलाई प्राप्त भइरहेको सन्देशले हामीलाई आउँदो दिनमा काम गर्न उत्साहित बनाएको छ’, निर्देशक भट्टराईले भने ।
भट्टराई निर्देशित ‘जात्रा’, ‘शत्रु गते’, ‘जात्रै जात्रा’, ‘महापुरुष’ ले पनि ५१ औँ दिनको यात्रा तय गरेको थियो । ‘महाजात्रा’ मा हरिवंश आचार्य, वर्षा राउत, दिव्य देव, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय छ ।
म्याक्स दीपेश खत्री र यज्ञश्वर पौडेलले संयुक्त रूपमा निर्माण गरेको फिल्मका कार्यकारी निर्माता रवीन्द्रसिंह बानियाँ हुन् ।