१० वर्षमुनिका बालबालिकाको निःशुल्क उपचारको मागसहित अनशनमा बसेका कोशी प्रदेशका पूर्वमुख्यमन्त्री केदार कार्कीले सरकारसँगको सहमतिपछि ४२ दिने शिशुको हातबाट जुस पिउँदै उनले अनशन तोडेका हुन् ।
मंगलबारबाट अनशन सुरु गरेका कार्कीको पहलमा उपचारको खर्च अभावमा ७ दिन विराट नर्सिङहोम बस्न बाध्य भएका विराटनगर महानगरपालिका- ६ निबासी निर्मला शर्माका ४२ दिनका छोरालाई अस्पतालबाट डिस्चार्ज गरेर घर लगिएको थियो ।
कार्कीले उठाएका ९ बुँदे माग पूरा गर्न सरकार तयार भएको सन्देश लिएर आर्थिक मामिला तथा योजना मन्त्री रामबहादुर मगर र आन्तरिक मामिला तथा कानुनमन्त्री लीलावल्लभ अधिकारी अनशनस्थल पुगेका थिए । मन्त्री अधिकारीले पूर्वमुख्यमन्त्री कार्कीले उठाएको माग सम्बोधन गर्न सरकार तयार रहेको बताए । बुधबार राति सरकार र कार्की पक्षका प्रतिनिधिबीच सहमतिपछि उनै शिशुको हातबाट पूर्वमुख्यमन्त्री कार्कीले जुस पिएका हुन् ।
पूर्वमुख्यमन्त्री कार्कीले कोशी सरकारले १० वर्षमुनिका बालबालिकाको निःशुल्क उपचार कटौती गरेको, गरिब जेहेन्दार विद्यार्थीलाई दिने छात्रवृत्ति हटाएको, महिला स्वयं सेविकाको प्रोत्साहन भत्ता रोकेको, सुकुम्वासीलाई जग्गा खरिद गर्दा दिने बैंक ब्याज अनुदानसम्बन्धी व्यवस्था बजेटमै कटौती गरेको आदि विषयमा विरोध जनाउँदै आमरण अनशन सुरु गरेका थिए ।