काठमाडौँ— प्रधानमन्त्री केपी शर्मा ओलीले नेपाल–भारत सम्बन्धका विभिन्न पक्षमा छलफल भएको बताएका छन्।
शुक्रबार बिमस्टेक सम्मेलनका क्रममा बैंककमा समकक्षी नरेन्द्र मोदीसँगको भेटमा दुई देशीय सम्बन्ध र क्षेत्रीय सहकार्यलाई अगाडि बढाउन नयाँ साझेदारीका लागि छलफल भएको बताएका हुन्।
प्रधानमन्त्री मोदीसँगको भेटपछि ओलीले सामाजिक सञ्जालमा लेखेका छन्, ‘मेरा प्रिय मित्र, भारतका प्रधानमन्त्री श्री नरेन्द्र मोदीजीसँग आज बैंककमा आत्मीय र सौहार्दपूर्ण संवाद भयो। हाम्रो संवाद अत्यन्त सार्थक र रचनात्मक रह्यो।
हामीले नेपाल-भारत सम्बन्धका विभिन्न पक्षमा छलफल गर्यौं। विम्स्टेक शिखर सम्मेलनले उठान गरेका मुद्दाका साथै दुई देशीय सम्बन्ध र क्षेत्रीय सहकार्यलाई अगाडि बढाउन नयाँ साझेदारीका लागि यो संवाद महत्त्वपूर्ण हुने छ।’
