काठमाडौं – रसुवामा आएको विनाशकारी बाढीका कारण भदौ १६ गते विहान ९ बजेसम्म ९८७ जना मानवीय क्षति भएको छ। बाढी प्रभावित क्षेत्रमा अझै ३ हजार ९९६ जना सम्पर्कविहीन रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणका अनुसार बाढी प्रभावित क्षेत्रबाट हालसम्म ११ हजार ४२४ जनाको उद्धार गरिएको छ। नेपाली सेनाको हेलिकोप्टरमार्फत मात्रै २५३ विदेशी र ४४९ नेपाली गरी ७०२ जनाको उद्धार गरिएको छ। उद्धारका क्रममा सेनाको हेलिकोप्टरले ४७३ पटक उडान गरेको जनाइएको छ। निजी क्षेत्रका हेलिकोप्टरबाट समेत ३९ वटा उडानमार्फत उद्धार गरिएको छ।
बाढी तथा विपद्का कारण २०९ जना घाइते भएका छन्। तीमध्ये १६५ जना विभिन्न अस्पतालबाट उपचारपछि डिस्चार्ज भएका छन्। नेपाली सेनाले सञ्चालन गरेको स्वास्थ्य उपचार सेवाबाट मात्रै २ हजार ७४० जनाले सेवा लिएका छन्।
२१ हजारभन्दा बढी सुरक्षाकर्मी परिचालन
खोज, उद्धार तथा राहतका लागि २१ हजार १११ सुरक्षाकर्मी परिचालन गरिएको छ। नेपाल प्रहरीका ९ हजार ९१२, नेपाली सेनाका ६ हजार ८९६ र सशस्त्र प्रहरी बलका ४ हजार ३०३ जना सुरक्षाकर्मी प्रभावित क्षेत्रमा खटिएका छन्।
सम्पर्कविहीनको खोजी तथा उद्धारमा सुरक्षा निकायसँगै भन्सार कार्यालय, अध्यागमन कार्यालयलगायतका निकाय परिचालित छन्। नुवाकोटबाट मात्रै १ हजार ५५८ जना सम्पर्कविहीन भएको विवरण प्राप्त भएको प्राधिकरणले जनाएको छ।
प्रभावित जिल्लामा करोडौँको राहत
सरकारले बाढी प्रभावित जिल्लामा नगद राहतसमेत उपलब्ध गराएको छ। रसुवा र नुवाकोटलाई १–१ करोड तथा धादिङलाई ५० लाख रुपैयाँ उपलब्ध गराइएको छ। यस्तै, प्रभावित १४ स्थानीय तहका लागि ६ करोड ७५ लाख रुपैयाँ राहत रकम उपलब्ध गराइएको छ।
बाढीका कारण विस्थापित भएकामध्ये नुवाकोटमा २ हजार ४६६, धादिङमा २५, रसुवामा १८३ र काठमाडौंमा २९६ जना होल्डिङ सेन्टरमा राखिएका छन्।
सञ्चार र इन्धन आपूर्तिमा समेत असर
बाढीले सञ्चार पूर्वाधारमा समेत ठूलो क्षति पुर्याएको छ। नेपाल टेलिकमका ११० र एनसेलका ६८ वटा टावरमा क्षति पुगेको छ। क्षतिग्रस्तमध्ये १५२ वटा टावर पुनः सञ्चालनमा ल्याइएको प्राधिकरणले जनाएको छ।
प्रभावित क्षेत्रमा हाल ४२ हजार लिटर डिजेल, १८ हजार लिटर पेट्रोल र ६ हजार लिटर हवाई इन्धन मौज्दात रहेको छ।
राहत सामग्री पुर्याउन हालसम्म ३७ ट्रक र ३७ बोलेरो परिचालन गरिएको छ। ती सवारीमार्फत खाद्य तथा गैरखाद्य सामग्री प्रभावित क्षेत्रमा पठाइएको छ।
यसैबीच, विपद्मा ज्यान गुमाएका तथा बेपत्ता भएकाहरूको शव व्यवस्थापन र पहिचानको कामसमेत जारी छ। विभिन्न अस्पतालमा पहिचान हुन नसकेका शव राखिएको र थप विवरण संकलन तथा पहिचानको प्रक्रिया अघि बढाइएको प्राधिकरणले जनाएको छ।
बाढीबाट ठूलो मानवीय तथा भौतिक क्षति भएपछि सरकारले प्रभावित क्षेत्रमा खोज तथा उद्धारसँगै राहत, स्वास्थ्य सेवा, सञ्चार र इन्धन आपूर्ति पुनःस्थापनालाई प्राथमिकता दिएको जनाएको छ।
