काठमाडौं, — नेपालमा हाल पश्चिमी वायू र अरब सागरमा बनेको न्यून चापीय प्रणालीको प्रभाव परेको छ । उक्त प्रणालीको असरले देशका विभिन्न स्थानमा बदलीसँगै वर्षा र हिमपातको सम्भावना रहेको मौसम पूर्वानुमान महाशाखाले जनाएको छ ।
महाशाखाका अनुसार आज कोशी प्रदेश, मधेश प्रदेश, बागमती प्रदेश, गण्डकी प्रदेश र लुम्बिनी प्रदेशमा साधारणतया बदली रही बाँकी प्रदेशहरूमा आंशिक बदली रहनेछ । दिउँसो बागमती, गण्डकी र लुम्बिनी प्रदेशका केही स्थानहरूमा, कोशी र मधेश प्रदेशका थोरै स्थानहरूमा तथा कर्णाली प्रदेशका एक–दुई स्थानमा हल्का वर्षा पर्ने सम्भावना छ ।
त्यसैगरी, कोशी, बागमती र गण्डकी प्रदेशका उच्च पहाडी तथा हिमाली भू–भागका थोरै स्थानहरूमा मध्यम हिमपात र कर्णाली प्रदेशका उच्च भू–भागका एक–दुई स्थानमा हल्का हिमपात हुन सक्ने पूर्वानुमान गरिएको छ ।
आज राति पनि कोशी, बागमती र गण्डकी प्रदेशमा साधारणतया बदली रहने र ती प्रदेशका पहाडी तथा हिमाली भू–भागमा हल्का वर्षा वा हिमपात हुने सम्भावना रहेको महाशाखाले जानकारी दिएको छ । बाँकी प्रदेशहरूमा आंशिक बदली रहनेछ ।
महाशाखाले हिउँदको सुरुवातसँगै पश्चिमी वायू सक्रिय बन्दै गएको र यसले उच्च भू–भागमा चिसो बढाउने सम्भावना रहेको बताएको छ । जनतालाई आवश्यक सतर्कता अपनाउन अनुरोध गरिएको छ ।
