वीरगञ्ज — वीरगञ्ज भन्सार कार्यालय हुँदै चालु आर्थिक वर्षको पहिलो नौ महिनामा रु ७९ अर्ब ५४ करोड बराबरको वस्तु तथा सामान निर्यात भएको छ।
गत आर्थिक वर्षको सोही अवधिमा रु ६९ अर्ब ३५ करोड बराबरको निर्यात भएकोमा यस वर्ष १५ प्रतिशत अर्थात् रु १० अर्ब १९ करोडले वृद्धि भएको हो।
कार्यालयका सूचना अधिकारी उदयसिंह विष्ट का अनुसार चालु आवमा यो नाकाबाट निर्यात उल्लेख्य रूपमा बढेको छ।
निर्यातमा सबैभन्दा ठूलो हिस्सा प्रशोधित भटमासको तेलको रहेको छ। चालु आवको नौ महिनामा रु ४३ अर्ब ६१ करोड बराबरको भटमास तेल निर्यात भएको छ, जुन गत वर्षको सोही अवधिको रु ३६ अर्ब ६२ करोडभन्दा उल्लेख्य वृद्धि हो।
त्यस्तै, फलफूलको जुस रु ५ अर्ब ८४ करोड, प्रशोधित पाम तेल रु ५ अर्ब २४ करोड र सूर्यमुखी तेल रु ५ अर्ब ५ करोड बराबर निर्यात भएको छ। अघिल्लो वर्षको तुलनामा पाम तेलको निर्यातमा उल्लेख्य वृद्धि भएको छ भने सूर्यमुखी तेलमा केही गिरावट देखिएको छ।
यस अवधिमा विभिन्न प्रकारका कपडा रु २ अर्ब ६९ करोड र सिन्थेटिक यार्न रु १ अर्ब ९४ करोड बराबर निर्यात भएको कार्यालयले जनाएको छ।
वीरगञ्ज नाका नेपाल–भारत व्यापारको मुख्य प्रवेशद्वार मानिन्छ, जहाँबाट हुने निर्यात–आयातले समग्र व्यापार सन्तुलनमा महत्वपूर्ण प्रभाव पार्दै आएको छ।
