काठमाडौं – काठमाडौं महानगरपालिका वडा नं ११ वडा कार्यालयले आजदेखि आफ्नै नवनिर्मित भवनबाट सेवा प्रवाह सुरु गरेको छ । यसअघि वबरमहलस्थित भाडाको भवनबाट सेवा दिँदै आएको वडा मंगलबारदेखि आफ्नै प्रशासनिक भवनमा सरेको हो ।
नवनिर्मित भवनमा शिलालेख अनावरण गर्दै वडाध्यक्ष तथा महानगरको भवन व्यवस्था समितिका संयोजक हीरालाल तण्डुकारले सबै सेवाग्राहीका लागि पहुँच सुनिश्चित हुने गरी भवन निर्माण गरिएको जानकारी दिए । उनले भने, “शारीरिक अवस्था कमजोर हुने, व्हीलचेयर प्रयोगकर्ता, दृष्टिविहिन सबै सेवाग्राहीहरू हरेक तलामा पुग्न सक्ने गरी भवन निर्माण भएको छ । हरेक तलाका शौचालय सबैका लागि प्रयोगयोग्य छन् ।”
उनका अनुसार महानगरका अन्य सार्वजनिक भवनहरू पनि सबै नागरिकको पहुँचमा हुने गरी डिजाइन र निर्माण भइरहेका छन् ।
भवन उद्घाटन कार्यक्रममा वडा नं. ८ का अध्यक्ष तथा सम्पदा तथा पर्यटन समितिका संयोजक आशामान संगत र वडा नं. ९ का अध्यक्ष तथा कृषि, पशुपन्छी तथा सहकारी समितिका संयोजक रामजी भण्डारीले वडाको नवनिर्मित भवन वडावासीका लागि गर्वको विषय भएको बताएका छन् । उनीहरूले सेतो रङका भवनलाई प्रतीकका रूपमा उल्लेख गर्दै, सेवाहरू पनि भवनको रङझैं पारदर्शी र जवाफदेही हुने अपेक्षा व्यक्त गरेका छन् ।
२०८० मंसिर २८ गते शिलान्यास गरिएको भवन ५ करोड ७ लाख २७ हजार रुपैयाँ लागतमा आर.एस. निर्माण सेवा ले निर्माण गरेको हो । करिब ११ आना जग्गामा ७ हजार २५० स्क्वायर फिट क्षेत्रफलमा बनेको चारतले भवन बागदरबारकै शैली र उचाइमा निर्माण गरिएको छ ।
इञ्जिनियर प्रेमबहादुर श्रेष्ठका अनुसार भवनमा आधुनिक भित्री सुविधा रहेको छ । भुइँतला (१,६३०.८१ स्क्वायर फिट) बाट सेवाग्राहीले प्रत्यक्ष सेवा पाउनेछन् । पहिलो तलामा वडाध्यक्ष, वडा सचिव र इञ्जिनियरका कक्ष, दोस्रो तलामा वडा सदस्य र कर्मचारी कक्ष, तेस्रो तलामा स्टाफ पेन्ट्री, मेलमिलाप कक्ष र ५० जना अट्ने सभा कक्ष निर्माण गरिएको छ ।
वडा सचिव धर्मराज भट्टराईका अनुसार स्वास्थ्य प्रवर्धन केन्द्र भने पहिलेझैं वबरमहलमै सञ्चालन हुनेछ ।
