काठमाडौं — राजधानीका तीन सञ्चारगृहको कार्यालय अगाडि निजी नम्बर प्लेटका गाडी बेवारिसे अवस्थामा राखिएको घटनाबारे नेपाल प्रहरीले छानबिन सुरु गरेको छ।
अनलाइनखबर, हिमालय टेलिभिजन र कान्तिपुर मिडिया समूहका कार्यालय प्रवेशद्वारमा अवरोध हुने गरी निजी कार पार्क गरिएको पाइएको हो। गाडीहरू कसले र किन राखेको भन्ने विषय खुल्न नसकेको प्रहरीले जनाएको छ।
अनलाइनखबरका कर्मचारीका अनुसार आइतबार बिहान करिब ७ बजेतिर अज्ञात व्यक्तिले काठमाडौंको बुद्धनगरस्थित कार्यालयको मूल गेट अगाडि कार पार्क गरेर छाडेका थिए। गाडीका कारण कार्यालयभित्र सवारीसाधन प्रवेश गर्न समस्या भएको बताइएको छ। घटनापछि कार चालकको पहिचान र अवस्थाबारे कुनै जानकारी प्राप्त हुन सकेको छैन।
घटनाको जानकारी पाएपछि प्रहरी टोली कार्यालय पुगेको थियो। काठमाडौं उपत्यका प्रहरी कार्यालयका प्रवक्ता प्रहरी वरिष्ठ उपरीक्षक पवनकुमार भट्टराईका अनुसार गाडीका चालक र धनीको पहिचान गरी नियन्त्रणमा लिन प्रयास भइरहेको छ।
उहाँले अन्य सञ्चारगृहबाट पनि यस्तै प्रकृतिको सूचना प्राप्त भएको जानकारी दिँदै गाडी हटाउने र घटनाबारे थप अनुसन्धान अघि बढाइएको बताउनुभयो।
प्रहरीले घटनाको उद्देश्य र संलग्न व्यक्तिको पहिचानका लागि आवश्यक अनुसन्धान भइरहेको जनाएको छ।
